Tene bo empleado balioso cu felicidad laboral

“Evert ta un empleado masha aprecia. Mi clientenan ta papia positivo di dje. E ta trece trabou aden y ami semper por conta riba dje.” Siman pasa mi a bay come cu Xavi kende ta director di un compania di seguridad. Cu su 12 empleadonan, su compania ta bayendo bon. Cinco aña pasa ainda, nan tabata cu tres hende so. E tempo ey caba Evert tabata traha cu ne.


“El a yuda haci mi compania grandi”, Xavi ta conta. E mes ta mas un homber tecnico, kende sa “tur cos” con pa sigura edificionan di empresa. Riba tereno comercial e ta menos fuerte. Specialmente ora di trece ordonan nobo aden, e ta conta riba Evert. “E no ta solamente bon den busca cliente nobo, e sa con pa wanta nan tambe. Gran parti di mi benta ta danki na Evert.” Xavi ta conta con Evert ta tremendo bon den comunica cu hende. “E por papia cu tur hende sin ningun problema. No ta importa ken e tin su dilanti. E ta scucha bon y sa con pa pone tur hende sinti bon. Clientenan ta aprecia esey y nan ta gusta haci negoshi cu ne.”

“Nan ta purba di cumpra Evert fey mi”

Pakico Xavi ta conta mi e storia ‘ki? Aki ta unda e rabo di porca ta krul: e tin miedo di un caida di su compania si un dia Evert dicidi di bay traha otro caminda. “Si un otro ofrec’e un salario halto, e ora kisas e no por nenga. E ora si m’a perd’e.”

Evert ta gana un bon salario cerca Xavi. Mi ta conta Xavi cu hisa su salrio so no ta e solucion. Tin mas cu solamente placa. E palabra clave ta ‘felicidad laboral’. Esey ta loke ta determina te unda un empleado tin su trabou na pecho. Mas grandi e felicidad laboral ta, mas grandi e dedicacion y mas largo trahadonan ta keda. For di investigacion a sali na cla cu felicidad laboral tin su refleho den tur forma. E ta conduci na menos stress, menos a.o. na trabou, menos incidente na trabou, clientenan satisfecho, calidad mas halto di servicio y un satisfaccion mas halto cerca cada trahado.

Xavi a puntra mi con e por aumenta felicidad laboral cerca su empleadonan. Mi no ta un guru riba felicidad, pero mi sa si cu bo no por duna bo empleadonan un armadura. Duna nan espacio pa bin cu nan propio ideanan. Como dunado di trabou bo so no por tin ful dominio di poder tampoco. Permiti bo mes pa laga los, inculca confiansa den bo trahadonan y laga nan mes bin cu solucion. Duna espacio na nan talento y pasion personal.

Of algo semehante: duna atencion na salud y fitness di bo trahadonan. Percura cu nan ta haya suficiente movecion durante nan dia di trabou. Stimula y percura pa cuminda saludabel. Organisa de bes en cuando un excursion cu actividad. Okey, esey ta costa un poco, pero como negociante bo ta bay tin menos perdida door di malesa y un personal cu ta fit, ta presta miho. Nan ta sinti nan mes miho. Esey tambe ta determina felicidad laboral.

Durante nos lunch net nos tabata saboria un pariyada di galiña. Xavi a wak mi precocupa y el a puntra: ‘esaki ta bastante saludabel, hey?’. Sigur cu si, Xavi. Mi no a caba di bisa bo cu placer den bo trabou ta bin prome cu tur cos? 😉

Cerca ENNIA nos ta specialisa den reconoce riesgo. Por ehempel riba tereno di personal. Cu placer nos ta pasa cerca bo un rato pa sigui papia riba esaki. Seguridad ta un cuestion di HACI cos hunto.

Traha un sita awor

Juliska Cijntje-web.png
Juliska Cijntje
Cördinator Customer Relations