E-mail falsu por paralisá bo kompania

Hopi hende ta pensa: e-mail falsu, ami si no ta kai den e ko’i. Lubidá. Awendia kriminalnan tambe ta traha di manera hopi profeshonal. Investigashon ta mustra ku empleadonan ta habri 30% di tur e-mail falsu ku drenta un kompania. Kriminalnan ta enfoká prinsipalmente riba kompanianan mas chikitu.

“ Un solo empleado ta klek riba un lenk robes i e resultado por ta fatal”

No kere ku ta un bandidu skondí den un kamber chikitu i skur ta hasi e trabou. Ta trata di kriminalidat organisá ku miles di “kolaboradó”. Nan por ta na kalke parti di mundu. Nan ke akumulá informashon delikado di bo kompania, saka sèn fo’i bo, sekuestrá òf infiltrá den bo kompania. Komo lego bo no por hasi distinshon entre un negoshi kriminal profeshonal i un negoshi berdadero.

Kon e kos akí ta bai? Un kompania ta risibí un e-mail ku ta mustra manera ta un banko, òf un instansha di gobièrnu òf un otro instansha a mand’é. Bo empleadonan a kustumá ku nan ta habri un e-mail pa por lesa su kontenido. Mayoria bia den un e-mail asina nan ta pidi pa klek riba un lenk òf habri un suplemento. Seguidamente un vírùs ta plama ku por ehèmpel ta blòkia bo sòftwèr òf kopia informashon importante.

Kiko bo mester paga tinu n’e? Kisas e kos mas importante ta e adrès di e-mail di e áfzènder. Hopi bia ta un adrès dudoso òf un vershon dedusí di e nòmber berdadero di un kompania eksistente. Figurá bo, tin pará Wesley l MCB Bank komo “áfzènder”. E ta mustra konfiabel. Ta te ora bo bai para ku bo kùrsùr riba e áfzènder (òf bo klek ku e kònòpi na man drechi riba bo mùis), bo ta mira e nòmber kompletu. E ora ei numa bo ta mira ku no ta e adrès di e-mail korekto di e banko.

Asina por menshoná diferente karakterístika. Komo empresario ta importante pa bo keda papia ku bo empleadonan. Sòru pa nan keda konsiente di e peliger. Un solo empleado ta klek riba un lenk robes i okashoná un problema grandi. Pues, papia tokante e riesgonan. Esaki ta yuda oumentá bo organisashon su resistensia.

Ku plaser nos di ENNIA ta yuda bo ku esaki. Nos ta spesialisá den rekonosementu di riesgo. Siguridat ta prinsipalmente un kuestion di koperá ku otro.

Traha un sita awor

Nathaly Maduro-web.png
Nathally Maduro
Account Manager Direct Sales