Jeffrey ta un hòmber hóben fuerte, pero e ta tosa manera un hòmber bieu. M’a puntr’é: Bo ta huma? “Nò, mi ta traha den konstrukshon. Hinter dia stòf ta kansa mi.” Mi di kuné:” bisti un máskara di protekshon kontra stòf antó no”.

Ban serio sua, niun hende no ta hasi e ko’i!
Nan ta hari mi!”

Esaki ta típikamente e kultura den konstrukshon. Papia tokante siguridat ta zùrmentu. Mi ta komprondé, pero p’ami un profeshonal berdadero ta tribi para pa protekshon di su salú i pa siguridat na su trabou. B’a yega di tende di pulmon di stòf? Esei sí ta un asuntu hopi  serio. E ta afektá prinsipalmente  trahadónan den konstrukshon, pero tambe trahadónan den sektor di metal, trahadónan den mina i trahadónan ku ta atendé ku eksplotashon di piedra.

Mi ke puntra Jeffrey si e ta bebe sufisiente awa durante trabou. Pero mi no ta hasié, pasó mi sa e kontesta kaba. Rei 3 bia den kua profeshon tin mas kaso di deshidratashon. Trahadónan den konstrukshon, trahadónan ku ta drecha i konstruí dak, lasdónan. Nan ta okupá e promé lugánan riba e lista. Mi no tin niun nesesidat di hunga ròl di sabelotodo. Pero komo konsehero di seguro mi ta mira sí kiko ta konsekuenshanan di un ambiente di trabou ku no ta salú i kaminda  tin falta di siguridat. Esaki ta malu pa e personal pero tambe pa e negoshi. E ta kosta hopi plaka. Un empleado malu na kas ta kosta dos i mei bia su salario brutu. Pasó produkshon ta baha, i ta koleganan (den overtime) i òf empleadonan temporal mester hasi e trabou.

Tin hopi  kompania ku diferente regla tokante siguridat  i un ambiente salú na trabou. Pero kon nos ta atendé ku e reglanan akí? Laga nos tuma komo ehèmpel un kompania di konstrukshon promedio. Tuma riesgo i blòf ku esaki ta parti di e kultura den e sektor akí. Traha ku tantu siguridat  ta ko’i hende kèns. Naturalmente tur hende sa ku nan mester bisti hèlm i kumpli ku  sobrá reglanan di siguridat. Pero nan ta hasié semper tambe? Einan tin e solushon pa un ambiente di trabou mas sigur i salú: disiplina diario. Regla ta importante, pero mas importante ta kon nos ta anda ku ne.

Liderazgo ta hunga un rol esensial den esaki. E direktor tin un influensha grandi  riba e kultura i estilo di traha den su empresa. Un komportashon ehemplar ta krusial. Pues, no kore subi un tereno di konstrukshon den bo Audi antó baha fo’i outo tur na flus  pa kana wak rònt un ratu. Asina bo mes ta kibrando regla. Si abo bisti un vèst i un hèlm bo ta ehèmpel bibu di un mensahe  ku mester ta kla pa tur hende. Jeffrey tambe tin rèspèt pa esaki.

Na ENNIA nos ta spesialisá den rekonosementu di riesgo. Tambe ora ta trata di salú i siguridat di bo personal. Ku plaser nos ta pasa serka bo pa papia mas aleu. Siguridat ta prinsipalmente un kuestion di AKTUA huntu ku otro.

Traha un sita awor

Sayonara Tiel
ENNIA Corporate Insurance Specialist