“Evert ta un kolega di oro. Mi klientenan gust’é. E ta trese trabou aden i semper mi por konta kuné.” Siman pasá m’a bai lunch ku Xavi. E ta direktor di un empresa di siguridat. Huntu ku su 12 empleadonan e ta drai bon. 5 aña pasá ainda nan tabata 3 empleado so. E tempu ei tambe Evert tabata traha huntu kuné kaba.

“El a yuda hasi mi kompania grandi”, Xavi ta konta. E mes ta prinsipalmente un hòmber tékniko ku sa tur kos tokante medidanan di siguridat pa edifisionan di negoshi. Pero komersialmente e ta ménos fuerte. Prinsipalmente pa buska kliente nobo e ta dependé di Evert. “E no ta solamente bon den buska kliente nobo, e ta bon den mantené nan tambe. Un gran parti di nos produkshon ta danki na Evert. Xavi ta konta ku prinsipalmente den e parti di komunikashon Evert ta hopi fuerte. Fásilmente  e ta hiba un kombersashon ku kalke hende, no ta importa ta ken. E ta skucha bon i tur hende ta sinti nan mes kómodo serka dje. E klientenan ta apresiá esaki i ta gusta hasi negoshi kuné.

“Nan ta purba kumpra Evert  fo’i mi.”

Dikon Xavi ta konta mi e historia akí? Akinan su miedu ta bini dilanti. E ta teme ku si Evert disidí di bai un dia, su negoshi ta sufri un kaida. “Kisas un hende ta ofresé un salario asina haltu ku e no por bisa nò. E ora ei m’a pèrdé.”

Xavi ta paga Evert un bon salario. Mi ta bisa Xavi ku solamente oumento di salario no ta e solushon. Sèn no ta tur kos. E sekreto ta “satisfakshon den trabou”. Esei ta determiná kuantu kurason un empleado tin pa su empresa. Mas grandi su satisfakshon, mas tantu su dedikashon i mas largu e empleado lo keda ku e empresa. Investigashon ta mustra ku satisfakshon den trabou ta influenshá e empleado di diferente manera. E ta kondusí na ménos strès, ménos malesa, ménos aksidente na trabou, kliente kontentu, kalidat mas haltu di servisio i mas empleado kontentu.

Xavi ta puntra mi kon e lo por oumentá satisfakshon den trabou serka su empleadonan. Ami no ta niun guru di felisidat, pero mi sa sí ku bo no mester hinka bo empleadonan den un hárnas. Duna espasio pa nan mes kontribushon. Komo dunadó di trabou bo no tin mester di tene tur kos den bo mes man. Tribi laga lòs. Konfia bo empleadonan i laga nan mes pensa solushon. Duna espasio pa nan talento i pashon personal.

Of, dediká atenshon na salú i kondishon físiko di bo empleadonan. Sòru pa nan por move sufisiente durante dia. Stimulá komementu salú i sòru pa tin kuminda salú disponibel. De bes en kuando organisá un keirumentu aktivo. Oké, ta kosta un tiki sèn, pero asina abo komo empresario ta krea empleadonan mas salú, i personal fet ta presta mihó. Tipo di kosnan asina akí tambe ta kontribuí na e grado di satisfakshon den trabou.

Durante lunch nos a kome un galiña di grel hopi dushi. Xavi a wak mi ku un kara prekupá i puntra mi: “Esaki ta salú sufisiente tòg? Sigur sigur Xavi. Min’ kaba di bisa bo ku satisfakshon den trabou ta mas importante ku tur kos! 😉

Na ENNIA nos ta spesialisá pa rekonosé riesgo. Por ehèmpel riba tereno di personal. Ku plaser nos ta pasa serka bo pa nos kòmbersá mas aleu. Siguridat  ta prinsipalmente un kuestion di aktua huntu ku otro.

Traha un sita awor

Juliska Cijntje
Cördinator Customer Relations