Luna pasa tabata asina leu trobe. E di tantu aksidente ku mi outo. Di 3 den 2 aña. Mi a hasié un hòbi pa – ora mi mester di asistensha – kada bia skohe un otro empresa. Naturalmente esei tin di haber ku mi profeshon. Komo eksperto di seguro mi ta bishitá hopi negoshi. Mi ta disfrutá di kana wak rònt i sinti e ambiente. Kada negoshi ta otro, kada empresario tin su mes estilo.

Pues, mi ta skohe kalke garashi pa laga drecha mi outo. Asina mi a kore yega na un garashi gewon meimei di un bario. E doño ta risibí mi den e wèrkplats, kaminda tin aki aya un empleado trahando. Tur den overòl nèchi, tur ku kapa na boka tambe.  Pasó a kaba di spùit. E damp di ferf tabata molestiá mi, i mi a bira puntra si no tin un instalashon pa chupa e holó.  Un di e gainan a bira bisa mi: “E kabina ta habrí tòg.”

 “Bientu ta nos instalashon pa chupa holó”

Aparentemente t’asina fásil ta pensa tokante esaki. Pa ta hopi kla: mi ta papiando akinan di un negoshi ku ta drai bon i ku tin 10 empleado. Fo’i ora m’a baha fo’i outo mi por a hole e fèrf bon kaba. M’a pensa no ta masha agradabel si bo ke sinta riba bo pòrch den e bario akí.

Ora mi a wak rònt un tiki mihó, den un huki di e wèrkplats mi a mira un balente mashin di chupa holó pará. E ta kibrá, e doño a splika. Tur kos a verstòp, e ventiladó, e kanalnan di drenage, inkluso e kapa ku ta supla afó riba dak. Ta kosta algun mil florin pa pone e mashin funshoná atrobe. Mi a puntr’é kuantu e ta kere ta kosta si para trabou dje lugá di spùit outo akí pa motibu di e holó di fèrf. El a sakudí su kabes. Komo empresario e sa bon bon kiko mester pasa. Numa pa motibu di tantu trabou  nunka e no ta yega na atendé esaki. I saka tantu sèn asina naturalmente ta hasi doló tambe.

Tòg e invershon ta  bale la pena. P’e solo echo kaba ku su personal lo presta mihó i keda kas malu ménos pa motibu di e holó. Den mi ret di kontakto tin un persona ku ta bon den renovashon di instalashon i hèrmènt. Pa un bon preis e por feks e mashin akí tambe. Mésora nos ta traha un sita.

Ayera m’a pasa eibanda i m’a bai tira un bista atrobe. Djaleu e doño a mira mi yega i a hisa su dùim mésora. Ora m’a baha, nada di holó di fèrf. Bon solushoná!

Na ENNIA nos tin hopi di haber ku riesgo di personal. Esaki ta nifiká ku nos tin hopi konosementu tambe di medidanan di prevenshon. E konosementu ei ku plaser nos ta kompartié ku bo.

Traha un sita awor

Sayonara Tiel
ENNIA Corporate Insurance Specialist