Apresiabel mayor di muchanan ku ta bayendo skol,

Probablemente bo tin e tendensia pa traha un skema hopi strak pa bo yunan. Bo ta spera ku nan ta studia hopi ora, hasi práktika di materia online, hasi eksperimentu i traha relato di buki. Bo ta limitá  e kantidat di ora ku por wak televishon òf tablèt te ora tur kos ta kla! Pero tin algu importante..

Laga nan hunga pafó i bai kana keiru ku nan.

N’e momentu aki nos yunan tin mésun tantu miedu ku nos. No solamente nan ta tende tur loke ta pasa. Nan ta sinti nos ansha i strès tambe konstantemente. Nunka nan no a pasa den algu asina akí. Ya, nan ta haña e idea di 4 siman liber tremendo, i kisas nan tin e idea ku ta un fakansi masha dushi mes, sin ta realisá ku en realidat nan ta pegá den kas sin por topa ku nan amigunan.

Den e próksimo simannan lo bo por ripará ku ta bai surgi mas problema ku komportashon. Sea ta miedu òf rabia òf protesta pasó nan no por hasi nada “normal” – e ta yega. Nan ta bai haña mas “meltdowns”, atake di rabia, i komportashon kontrali den e simannan binidero. Esaki ta normal i loke bo por spera den e sirkunstanshanan akí.

Traha kuki i pinta ku fèrf.

Loke nos muchanan mester di dje awor akí ta amor i siguridat. Nan mester por sinti ku tur kos lo drecha bèk. Esaki por nifiká ku abo mester lubidá bo skema perfekto i duna  bo yunan espasio pa sinti nan mes mas mucha. Laga nan hunga pafó i bai kana keiru ku nan. Traha kuki i pinta ku fèrf. Hasi spèl i wak pelíkula. Hasi eksperimentu huntu, òf buska guia virtual den un museo òf parke di bestia. Kuminsá lesa un buki ku hinter famia. Drumi dushi huntu ku otro bou di un klechi sin hasi nèt nèt nada.

No prekupá ku retraso na skol. Tur mucha ta den mésun situashon awor akí, i nan tur lo logra anyway. Ora nos ta den klas atrobe ta bai koregí nan rumbo i yuda nan na nan propio nivel. Dosentenan ta eksperto riba e tereno akí! Awor akí no bai pleita ku nan pasó nan no tin gana di konta. No kuminsá grita pasó nan no ta sigui bo skema. No obligá nan bai studia 2 ora si nan no tin gana.

Salú mental di un mucha ta mas importante ku su nivel akadémiko.

Si tin un kos ku mi por bisa bo ta esaki: ora tur e kos akí pasa bai, salú mental di bo yu ta mas importante ku su nivel akadémiko. Nan lo keda kòrda pa hopi mas tantu tempu  kon nan ta sinti nan mes awor akí, en komparashon ku loke nan a hasi den e 4 simannan ei. Tene esei den mente tur dia di nobo.

Stay safe.