Apreciabel mayornan di muchanan cu ta bay scol,

Probablemente bo ta inclina pa traha ful un schema, di minuut pa minuut pa bo yiunan. Bo ta spera cu nan lo siña pa oranan largo, traha yen di ehercicio riba computer, busca cos riba internet y skirbi raportahe di buki. Bo ta bay limita nan tempo dilanti television te ora tur cos ta cla! Pero tin algo otro tambe cu ta hopi importante...

Hunga pafo cu nan, bay cana.

Nos yiunan tin mes tanto miedo cu nos na e momentonan aki. No solamente cu nan ta tende tur cos cu ta pasando, pero nan ta sinti tambe nos ansha y miedo constante. Nunca nan no a pasa door di algo asina ‘ki. Sigur cu nan ta haya e idea di tin 4 siman liber algo tremendo y nan a pensa caba cu ta un vakantie masha dushi mes nan a haya, sin realisa cu e realidad ta cu nan ta bay sinta paden den cas sin por wak nan amigonan.

Den e simannan cu ta bin, lo bo mira cu nan comportacion ta cambia. Esaki por ta pa motibo di miedo, rabia of un sorto di protesta pasobra nan no por haci nada ‘normal’. Bo por wel di sper’e. Nan ta bay haya mas ‘meltdowns’, explota di rabia y bira janchi-contrali den e simannan cu ta bin. Esaki ta normal y e ta di spera bou circumstancianan manera esnan cu nos ta bibando aden.

Horna cuki y mors cu verf.

Kico nos yiunan tin mas mester di dje na e momentonan aki ta: sinti nan mes safe y stima. Pa nan tin e idea cu tur cos lo drecha. Esaki ta nifica cu lo bo tin cu lubida bo plan perfecto y laga bo yiunan ta mucha. Hunga pafo cu nan, bay cana, horna cuki y mors cu verf. Hunga wega di carta,  dam, mens-erger-je-niet y wak pelicula hunto. Lesa un buki hunto den famia. Tapa bou clechi y no haci net net nada.

No worry cu bo yiu lo cay atras na scol. Tur mucha ta den e mesun boto y nan lo bounce bek sin ningun problema. Ora nan ta bek den klas, nan ta wordo guia y yuda na nan nivel. Maestronan ta experto den esaki! No bay pleita cu bo yiunan awor pasobra nan no tin gana di traha som. No bay grita si nan no kier sigui loke bo a planea pa nan. No obliga nan pa siña 2 ora largo tras di otro tampoco, si nan no kier haci esey. 

E salud mental di bo yiu lo ta mucho mas importante cu nan nivel academico.

Permiti mi laga bo cu e pensamento aki: ora tur esaki ta tras di lomba, e salud mental di bo yiu lo ta mucho mas importante cu nan nivel academico.  Pasobra con nos como mayor a laga nan sinti lo keda graba den nan mente y no e lesnan cu nan a siña den e 4 simannan aki. Pensa riba esaki den e dianan nos dilanti. 

Stay safe.